പ്രണയ വണ്ടി

ടൈം മെഷീനിന്റെ വണ്ടിയിൽ കയറി

ഞാൻ 50 വർഷം മുന്നിൽ ഇറങ്ങി  

എഐ സിസ്റ്റങ്ങൾ നഗരങ്ങളുടെ ഹൃദയമിടിപ്പ് കേട്ടു കൊണ്ടിരിക്കുന്നു,

ഹോളോഗ്രാമിലൂടെ ചിലർ ചന്ദ്രനിൽ പോകുന്നു 

വരുന്നു

ചൊവ്വയിൽ പോയ മലയാളി യുവാക്കളെ

കാണാനില്ലെന്ന വാർത്തകൾ വിർച്വൽ

ഫോണിൽ കേൾക്കുന്നു

വ്യാഴത്തിലെ ജയന്റ് റെഡ് സ്പോട്ടിൽ

നിന്ന് വൈദ്യുതി ഉത്പാദനം തുടങ്ങി

നാസ 

ആ ഡിജിറ്റൽ ഗാലക്സികളിൽ

നിന്ന് ഞാൻ മെല്ലെ ഇറങ്ങാൻ തീരുമാനിച്ചു

 

ന്യൂറൽ ലിങ്ക് ഹെഡ്സെറ്റ് ധരിച്ചപ്പോൾ

എന്റെ മെമ്മറി ആർകൈവ് തുറന്നു 

അവിടെ, ഇന്നത്തെ നീ..

ഒരു പിക്സൽ പോലും മങ്ങിയിട്ടില്ല,

ഒരു അൽഗോരിതത്തിനും മാറ്റാനാവാത്ത ചിത്രം

മെറ്റവേർസിൽ നിന്ന് ആയിരം അവതാറുകൾ

കൈവീശിയിട്ടും,

ഞാൻ ലോഗിൻ ചെയ്യാൻ നോക്കിയത്

നിന്റെ ഹൃദയത്തിലേക്കാണ്.

ടൈം ക്യാപ്സൂൾ ഡ്രൈവിൽ 

ഞാൻ സൂക്ഷിച്ചത് 

നിന്റെ ചിരിയുടെ വേവ് ലെങ്ത്

നിന്റെ ശ്വാസത്തിന്റെ ഫ്രീഖൻസി

എന്നാൽ അതിനെ ഡീകോഡ് ചെയ്യാൻ

ഭാവിയിലെ സൂപ്പർ കമ്പ്യൂട്ടറിനും കഴിയുന്നില്ല

കാരണം,

സ്നേഹം ഒരു കോഡ് അല്ല,

പ്രപഞ്ചം ആണ്,

അതിന് അവസാനമില്ല 

കാലമെത്ര കഴിഞ്ഞാലും 

വികസിച്ചു കൊണ്ടേയിരിക്കും 

അതിന്റെ അറ്റം തേടി പോയാൽ 

ഒരു മടങ്ങി വരവില്ല